L-Iskema tal-Ispiżerija tal-Għażla Tiegħek (POYC) tikkoordina u tiskeda d-distribuzzjoni ta’ prodotti mediċinali elenkati fuq il-Lista Formularja tal-Gvern (GFL), kif ukoll Oġġetti Mediċi Eċċezzjonali lil 233 spiżerija komunitarja madwar Malta u Għawdex, li jservu madwar 185,000 pazjent. Dan is-servizz jippermetti lill-pazjenti eliġibbli jiġbru l-intitolament tagħhom mill-ispiżerija komunitarja tal-għażla tagħhom, u b’hekk jiżgura aċċessibilità u konvenjenza akbar. Barra minn hekk, il-POYC tiddistribwixxi wkoll prodotti mediċinali akuti lil tliet Spiżeriji tal-Gvern fil-Furjana, Raħal Ġdid u l-Isptar Ġenerali ta’ Għawdex, biex dawn jingħataw lil detenturi tal-karta roża (permezz tat-Tieni Skeda tal-Att dwar is-Sigurtà Soċjali KAP.318).

It-Taqsima tal-Approvazzjoni tal-Mediċini hija responsabbli għall-ipproċessar tal-applikazzjonijiet u t-tiġdid tal-intitolamenti lill-pazjenti, permezz tal-Ħames Skeda tal-Att dwar is-Sigurtà Soċjali (CAP.318), filwaqt li tiżgura li dawn ikunu regolati kif suppost u mġedda fil-ħin. L-għadd totali ta’ intitolamenti attivi tal-Iskeda V huwa ta’ madwar 237,000.

Il-POYC tipproċessa l-applikazzjonijiet tal-Karti tal-Kontroll tad-Droga f’isem is-Supretendent tas-Saħħa Pubblika li jippermettu lill-pazjenti aċċess għal sustanzi kkontrollati. L-għadd totali ta’ Karti tal-Kontroll tad-Droga attivi huwa ta’ madwar 59,000.

Il-Kunsinna fid-Dar ta’ Preparazzjoni Nutrizzjonali Kompleta tipprovdi kunsinna diretta fid-dar lil pazjenti rreġistrati taħt l-Iskema POYC. L-għadd totali ta’ pazjenti eliġibbli biex jibbenefikaw minn din il-miżura huwa ta’ madwar 3,700.

Is-Sistema ta’ Trasferiment Bankarju għall-Pazjenti Ċeljaċi tipprovdi allowance trimestrali permezz ta’ trasferiment bankarju dirett fil-kontijiet bankarji tal-pazjenti, li tippermettilhom jixtru prodotti tal-ikel mingħajr glutina. Introdotta fil-bidu tal-2026, din is-sistema tissostitwixxi s-sistema preċedenti ta’ vouchers, tnaqqas il-proċedura burokratika u tipprovdi proċess aktar sempliċi u effiċjenti għall-pazjenti eliġibbli. Fil-ħin tar-rappurtar, l-għadd approssimattiv ta’ pazjenti li jibbenefikaw minn din l-iskema huwa ta’ 2,200.